廿年前一套《戀愛世紀》，捧紅的唔只係木村拓哉、松隆子，又或者係嗰粒無處不在的水晶蘋果，仲有木村手腕上的勞力士Explorer I Ref.14270，更令呢隻唔算熱門的款式引起搶購，絕無誇大！除咗明星效應，究竟Exploer I仲有咩魅力？
Explorer I ≠ Explorer II
首先，唔好以為Explorer I就係舊款，其實Explorer I與Explorer II係兩個截然不同的款式：Explorer II有一個數字外圈，通過GMT橙針可以得知第二時區時間，可以視之為新的Explorer Product line；而Explorer I就係由50年代推出的手錶一路傳承而來，錶圈只係單純磨光，維持手錶簡潔的外觀。
簡單就是美
又係勞力士運動款，究竟有咩特別？Rolex 214270係偏小的39mm錶徑，男女戴都非常適合；用上藍色夜光Chromalight物料，比綠色夜光錶面更顯獨特；錶面設計以簡約為主，冇太過複雜的功能，介乎運動款與休閒款之間，清新而純粹；3、6、9數字及三角形刻度亦與初代Explorer I一脈相承，有非常悠久的歷史意義。特別稱唔上，但就係呢份簡單而不花巧，吸引咗唔少錶迷的留意！
Explorer I 從何而來？
每隻勞力士背後都有一個故事，Explorer當然亦冇例外！1953年，世界最高峰珠穆朗瑪峰才首次被人類征服，其中探險家Tenzing Norgay就是手戴勞力士攀上高峰。之後，勞力士正式為手錶命名為「Explorer」，其後不斷改進，最新版本換上3132型機芯，採用Parachrom雙層藍色游絲及Paraflex避震裝置，確保手錶係極端環境下仍然運作自如。
明星效應
木村戴Explorer I，絕對唔係因為勞力士贊助，而係佢本身就係一個錶痴兼勞力士fans！除咗《戀愛世紀》，隔咗十幾年後，佢亦係《HERO 2》再戴Explorer I Ref.14270，睇得出呢個款式都係歷久不衰。
