18年新款終於陸續到貨，AP當然一如既往以Royal Oak Offshore系列最受歡迎，不過今次介紹的迷彩ROO，就竟然比普通黑藍色更引人注目！冇計啦，呢隻AP的軍事氣息非常強烈，迷彩錶帶、米色錶面、綠陶錶圈⋯⋯究竟有幾多高級品牌願意推出咁大膽的配色？
講起綠色陶瓷錶圈，大家一定會諗起另一個龍頭牌子Rolex，佢地隻綠水鬼過咗咁耐仲係非常炙手可熱，可見大家並唔係唔接受綠色。
不過，呢隻AP的配色就誇張好多，將迷彩的顏色用係手錶的不同部件，再加埋一向巨型的八角形錶圈，格紋錶面等，一出場已經先聲奪人。而且，綠色陶瓷錶圈以氧化鋯材質製成，再以鑽石磨頭拋光打磨，髮絲紋的紋理極有質感～
呢隻巨型又粗獷的ROO，的確唔係一般人可以carry得起，最好手臂有返咁上下粗壯，先至襯得起呢隻新款～至於擔心太過浮誇嘅錶迷，其實可以換返原裝附送的軍綠錶帶，與迷彩帶一樣經噴砂處理，有消光與防滑效果，軍事迷一定buy！
