買勞力士，其實有個隱藏成就：如果你買到「正皇冠」，即係在錶面朝上時，錶冠皇冠同樣朝上，就係運氣大爆發嘅幸運兒！更加有唔少勞迷疑問，究竟可唔可以上十四樓校正個皇冠？其實正皇冠係咪真係咁稀有？又可唔可以自己扭返正？
勞力士嘅防水技術出哂名夠安全，係防水最薄弱嘅錶冠位置，就用咗三扣鎖上鏈錶冠，由10個唔同零件組成，旋緊上鏈錶冠後，就可以令錶殻完全密閉，達到三重防水嘅效果。
因為唔同零件係分開製造，所以好難確保每個皇冠都係朝上，加上螺絲紋已經固定咗，除非用工具強行扭正，或者冒住破壞防水功能嘅風險拆錶冠重裝，否則製造完成後都改變唔到皇冠位置。
如果要勞力士確保每個皇冠都係正面朝上，當然並非冇可能，例如固定螺絲紋起始點，但會令工序及成本大增；亦有人提議最後先加工皇冠Logo，但因為皇冠係用立體金屬浮雕製成，後期加工嘅話，一不留神就會破壞錶身，似乎未必需要冒咁大嘅風險，滿足錶迷嘅完美主義。
唔少錶迷都希望買到正皇冠錶，話哂勞力士廣告全部都係正皇冠，即係連佢地都默認皇冠朝上係比較好啦，所以好難叫人唔介意嘅。不過，買到正皇冠雖然值得開心，但買唔到亦無需激氣，始終世事難以永遠完美，不如好好欣賞吓隻新錶仲好～
