唔少人用幾萬幾十萬買隻錶返嚟，但又唔識好好保養，成日戴住佢做各種極限運動，其實只係會慢慢消耗手錶的價值，就算經搶修救回手錶一條命，性能亦未必能夠重回巔峰。
其實，機械錶由各種精細的零件齒輪所組成，只要唔傷及佢地，各種小問題也非常容易解決，一於睇睇以下的通用手錶保養小tips，係時候審視下自己的用錶習慣喇！
金屬帶最易被腐蝕及生鏽，必須常常擦拭，但千其唔好用化學清潔劑，簡單清水已經足夠；至於皮帶，則容易因汗水而散發臭味，可以用牙刷沾上少少肥皂，輕輕刷洗表面就OK。不過，就算保養得宜，皮帶的壽命亦唔會非常長久，如果真係有損毀，應該盡早換上一條新錶帶才是上策。
另外，放置的地方也有考究，應避免放在電器、化學藥物旁，環境亦應以通風乾燥為主，以免受潮縮短手錶壽命。不要以為防水手錶就是萬能，高溫蒸氣的分子較小，或會滲入錶殻，雖然一般運動錶相信不成問題，但零件老化的手錶就要多加小心了。
如果使用有日期顯示功能的手錶，注意有某部分手錶品牌採用慢跳方式轉換日期，即在午夜前後齒輪將會慢慢運轉，所以在這段時間較校時間的話，或會損害齒輪，詳情可參閱說明書。
如果可以的話，應該定期為手錶正式保養，包括檢查零件、洗油及測準等，延長手錶壽命。若沒有定期送保，一旦手錶內的油乾涸，在失去潤滑的情況下，手錶運行將磨耗齒輪，加速零件損毀，到時維修的費用或會令荷包元氣大傷！
所以，見到走時開始失準，就係手錶響起警號，要你快啲拎隻手錶去維修喇。（不過，一般正常情況來說，手錶起碼可用五至十年，更有用家向我們表示，他的勞力士十多年來沒有送保仍運作暢順！）
