今年Jaeger LeCoultre 推出全新系列Polaris，原來已經係品牌第三次推出呢個系列喇！究竟點解呢個JLC系列彈出又彈入？
1968年誕生嘅佢，曾經在70年代被石英浪潮淹沒，08年曾經推出兩隻復刻紀念款，大受歡迎，於是正值今年系列50週年，Polaris終於強勢回歸，正式成為一個常規系列喇！
1968年，JLC推出Memovoc Polaris，具備防水及響鬧功能，名稱有極地探索的意味，獨特功能加上優雅外型，難怪停產後仍大受二手市場歡迎。今次復刻Polaris系列，將錶圈變得纖幼圓潤，以及改善錶冠手感，整體外型大致不變。如果你唔清楚Polaris的歷史，佢會係一個略帶中古優雅氣息的運動錶；如果你熟悉Polaris，相信會為JLC忠於原作的復刻感到驚喜！
而筆者最欣賞的一點，唔係方形圓角的大數字時標，亦唔係粗梯形刻度，反而係經太陽放射紋、磨砂顆粒及緞面打磨處理的錶面，不同外圈涇渭分明，令人賞心悅目，極富層次感，十分漂亮。
今次率先介紹其中兩款手錶：Polaris Automatic及Polaris Chronograph。
Polaris Automatic
最簡潔俐落的款式，不過細節位亦絕不含糊，雙錶冠分別可以調校時間及旋轉錶圈，作用類似潛水圈，可以作簡單計時，入門款來說非常不錯。
Polaris Chronograph
計時款通常係一個系列就最歡迎的款式，有運動氣息之餘，不同的小圓盤又可以增加手錶及實用性，再加上測速外圈，的確令手錶的可觀性大增！
今次Chronograph係Polaris未曾推出過的款式，頗有新鮮感，尤其係搶眼的藍面啡帶設計，不其然令人諗起IWC Pilot’s Watch小王子特別款，Classic又富Vintage味。
