Hublot一向多花臣，最鐘意挑戰大膽設計，呢隻充滿幾何意味的Big Bang款，又六角形又三角形，甚至連一支指針都冇，相信都會成頭問號。如果有涉獵開文化、藝術方面資訊，就會知道佢係Hublot與英國紋身店Sang Bleu的合作款式，比例和諧又完美，複雜而充滿符號美，非常特別！不過，相信錶迷睇完第一眼都會即刻浮現一個問號：究竟點樣睇時間？
別出心裁的錶面其實出至Sang Bleu創辦人Maxime Büchi的手筆，佢筆下的紋身作品，處處透露出佢有多崇拜幾何符號及追求完美，而今次更乘著與Hublot的合作，將圓形、三角形、方形等線條互相交錯重疊，立體又令人眼花繚亂，將手錶化身獨特的設計品，有理念有實際。
功能方面，呢隻Hublot繼續顛覆大家的讀時習慣，錶面有三個交疊的鍍銠八角形，由大至小、外向內分別係小時、分鐘及秒顯示，層層延伸至45mm鈦金屬錶殻，展現出幾何圖形的神秘與複雜，只要習慣咗新式讀時，相信都不成問題。
最重要的是，的確甚少瑞士品牌可以carry得起Sang Bleu變幻複雜的幾何圖案，亦未必勇氣顛覆手錶向來注重讀時清晰的傳統觀念，但係冇乜歷史包袱的Hublot，自然要走一條與別人不同的路，令呢隻獨特鮮明的Big Bang Sang Bleu，毫無懸念地、從裡裡外外都充滿Hublot氣息。
