今年百事圈GMT Master II一出，唔少人怨「點解要出珠帶（Jubilee）而唔係格帶（Oyster）？」首先唔好咁嫌棄珠帶先，怕老土可以揀classy的全鋼款，而且珠帶的優點其實唔少，貼服靈活的設計夠舒適，如果唔係點會咁受上一代歡迎？
可珠帶在新一代勞迷的普及程度唔算高，唔少人嫌佢比較老氣，唔夠格帶乾淨俐落，簡潔大方。其實，Jubilee錶帶係特別為1945年面世的Datejust而製造，所以勞力士官方會叫佢做「紀念型錶帶」，絕對唔係賣剩蔗，而係一條有故事嘅錶帶。呢款帶配有兩款錶扣，除咗常見的摺扣，皇冠扣可以將錶扣隱藏在珠帶當中，戴上手極有首飾感覺，同時賦予錶帶更多個性。
早年珠帶有個缺點，就係部件太多，經過長時間佩戴，鍊節之間的間隙會變大，令錶帶變得愈來愈鬆。不過近年勞力士已經大大改善呢個問題，包括全數改為實心鋼帶，而製造技術亦隨年月精進，加上勞力士的904L鋼質量高，短時間內相信唔洗擔心呢個問題。
Jubilee優點就係舒服，一摸上手已經可以發現分別，中間一行因為由眾多細小部件組裝而成，所以可以靈活改變角度，貼服手腕，當年一推出立即大受歡迎；而且，Jubilee錶帶夠經典，亦鮮有品牌採取同類設計，可以話係勞力士嘅標誌之一！
