Tudor平實嘅價格功能加上年輕討好嘅外型，成功建立出自己風格及定位，一啲都唔輸蝕畀大哥勞力士。
當然，Tudor志氣當然唔只得咁少，近年動作頻頻，由代言人到新錶款都處處流露強烈嘅野心，2017嘅新款Heritage Black Bay Chrono，無論功能定設計都相當令人眼前一亮，呢個價絕對諗得過！
功能方面，以往嘅Black Bay只係簡單嘅大三針，頂龍加多個日曆顯示，今次就嚟個大改革，將潛水錶融入計時功能，具備分、秒計時、測速錶圈、70小時動儲及200米防水。作為Black Bay第一款計時錶，機芯用咗出名精準細緻嘅Breitling B-01計時機芯為基礎再改裝，慳咗成本之餘又確保品質，的確係上佳做法。
另外，新款將潛水錶錶圈轉為測速刻度圈，不銹鋼材質比以往陶瓷圈成熟，紋路呈現啞色光澤，與黑色顆粒錶面各有質感，加埋錶面上嘅隻計時圈及日期窗，相當精緻細膩。（不得不提，無論㨂鋼帶定皮帶，都會附送牛仔布風織紋錶帶，令人諗起碧咸係廣告著嗰件牛仔恤衫。）
有人就覺得呢款與同樣強調賽車計時功能嘅勞力士地通拿非常類近，而個設計就同Explorer II 216570BK相似，同樣係黑面加不銹鋼錶圈，不過價錢就相差一大截喇。唔知大家又點睇？大家對呢隻Heritage Black Bay Chrono滿意嗎？定係比較鐘意傳統潛水錶嘅舊款Black Bay？
