最受白領歡迎的手錶牌子，毫無疑問應該非IWC莫屬，而當中人氣最高的入門款，就絕對係Portugieser Chronograph Ref.3714！
今年正值Ref.3714面世20週年，難得呢款手錶咁多年嚟都冇咩大改動，仲要熱賣足咁多年，可見無論外型或功能也受到市場認可，經得起時間洗禮，唔使驚買錯錶！
功能方面，實用的Chronograph款一向係入門錶迷的心水選擇，呢款IWC Ref.3714就係小三針加上秒、分計時，配上44小時動儲及30米防水，雖然冇咩大驚喜，而且欠缺日曆，但就一定值回票價。
機芯方面，可能唔少人垢病79350並唔係IWC自製機芯，但其實IWC已經將ETA 7750機芯改裝得出神入化，準確度極高，而且經典耐用，絕不比自製機芯遜色。
而Ref.3714大受歡迎的原因，就係體現在它的常青設計上：41mm錶面用上浮雕數字、藍鋼指針及圓點刻度，一貫Portugieser的優雅配置。值得一提的是，市面一般Chronograph都用上三個小錶盤，IWC Ref.3714的陷入式兩圈設計無疑顯得清新可人，增加錶面的層次及空間感之餘，又唔會太過侷束擁擠。
最後，3714有好多顏色選擇：成熟的白面金針、年青的白面藍針、流行的藍面銀針、型格的黑面銀針等等，全部都非常百搭，咁就唔使擔心襯唔到衫喇！
