潛水錶有唔少選擇，詢問熱度最高一定係Submariner等Rolex，另外經典的Blancpain Fifty-Fathoms其實亦頗受歡迎，可惜兩者價錢都要五萬起跳，未必所有錶迷也適合。
其實，Omega的Seamaster系列外型款式多樣，粗獷風有斯文風亦有，價錢豐儉由人，無論新手定老玩家都一定揀到啱心水的錶款～
另外，Omega逐漸為旗下手錶全數換上防磁機芯，可抵抗15,000Gauss以上的磁力，入門級價錢嚟講絕對算高規格！今次先介紹以下三款Seamaster：Aqua Terra、Seamaster 300及Planet Ocean 600。
Aqua Terra
Aqua Terra的標誌性設計就係甲板式紋理配鍍銠指針刻度，靈感源自豪華遊艇上的木甲板，為運動添上一絲優雅。雖然外型比較簡約，但亦設有分鐘圈，日曆放在6時位置，設計平衡，三針日期款的不錯選擇。
Seamaster 300
設計比較斯文，所有數字及刻度尺寸都恰到好處，而且嵌入式小時刻度經vintage夜光處理，配上經典闊箭針，外型復古！
而呢隻錶最出名的地方，就係與007系列電影《Spectre》中的手錶同款～雖然唔係同一隻特別版，不過作為原生款式，大部分細節都十分類同，換上黑灰NATO帶後，與007限量版幾可亂真。
Planet Ocean 600
外型與傳統潛水運動錶比較相似，43.5mm大錶徑運動風格強烈，而規格也非常高：600米防水、排氦閥門、黑陶單向旋轉錶圈及橡膠錶帶，配上加闊數字及加粗指針刻度，在漆黑的深水環境亦能清晰讀時，係一款偏向功能實用性的Seamaster。
