因為手動上鏈而對一隻錶卻步？咪住先，不妨了解多少少手動上鏈！論方便程度，其實手動機芯未必比自動機芯輸蝕，最重要係唔需要額外添加自動陀，可以完美體現機芯的精緻細膩，將機械錶的美麗表露無遺。
1. 快速上鏈
對於平日活動量唔大嘅人，例如久坐的上班族，其實未必可以令單靠日常活動的手腕擺動，而令自動手錶完全上鏈，最後可能仍要依賴手動上鏈，以免手錶停止走動。
手動上鏈的好處，就係可以定時一次過上滿鏈，而且過程快速，只要計算準確，就可以避免動力耗盡的意外！不過，要小心的是，初次接觸手動上鏈的人可能會「上爆鏈」，必須好好聆聽及訓練手感，知道幾時要停止上鍊。
2. 機芯纖薄、結構簡單
自動機芯的原理，就係多咗一個自動陀，疊加在手動部分的主體上，機芯厚度無可避免會增加。
至於手動機芯，構造相對簡單，零件較少，所以比較纖薄輕盈，而且保養及維修亦相對簡單便宜。
3. 完美展現機械錶的工藝
因為冇自動陀遮掩，所以錶迷可以盡情欣賞機芯各種細節，包括各種削角、拋光、打磨，以及精緻的螺絲、寶石、擺輪游絲等等，愈高級的手錶品牌，打磨得愈細膩，例如A. Lange & Söhne、Patek Philippe等，使用手動機芯的比例極高，以便佩戴者盡情欣賞它們自豪的作品～
