IWC的Ingenieur系列雖然比較小眾，但定位同設計都非常鮮明，絕對有理由相信IWC將各種大膽新奇的創意全數奉獻畀Ingenieur：唔係用奇特的材質，就係具備複雜嘅功能，確實錶與其名，以精密的微型科學呈現工程師的本質，極有未來感，今次介紹的IW379201就係一個好例子～
IW379201係萬年曆，不過就跳出框框，以科技感展現傳統的機械工藝，唔講唔知係老牌瑞士錶！方形數字、粗針、黑白色對比強烈，而且三個小錶盤係半透明的藍寶石水晶玻璃，數字跳動時可以睇到背後的機械運作，新奇又有立體感，鐘意機械感的錶迷應該相當驚喜。
另外，IW379201以賽車駕駛儀錶盤為靈感，以堅固輕盈的鈦鋁合金為錶殻，冰冷的金屬光澤與黑白錶面好夾，極具科技感。
可能令唔少人失望嘅係，IW379201作為萬年曆並冇具備月相顯示，始終月相盤比較柔美，同標榜機械感的Ingenieur唔太合襯，顧此失彼反而更唔討好。不過，IWC就以非常創新的「錶中錶」取而代之，12時方向的錶盤係時、分累計計時，唔洗分咁多個計時盤，省時又方便。
可惜，2017年IWC為Ingenieur改款後，新款設計趨向保守，雖然外型仍然獨特，但第一眼望唔再令人驚艷，就好似Pilot Watch系列咁愈嚟愈向主流靠攏，確實令人惋惜。其實， 筆者甚至覺得呢款Ingenieur可以擠身高級運動錶的行列，唔知你又點睇？
