今年Baselworld錶展照例由Rolex大出風頭，除咗百事圈之外，其實呢隻沙士圈GMT Master II人氣一啲都唔弱，玫瑰間金錶配啡黑圈的新配搭清新又優雅，仲換埋新機芯，確實非常吸引，難怪詢問度唔比百事圈差！
如果你對古董勞有少少認識，可能知道勞力士好耐之前都出過啡圈GMT Master II，包括單色啡圈及雙色米啡圈，不過啡黑圈的配搭的確係首次！勞迷向來鐘意改花名，特別係雙色圈GMT Master II，繼可樂圈、百事圈及batman後，今次啡黑圈得到「沙士圈」的暱稱，非常貼切。
先講講設計：啡黑圈與玫瑰金的色彩配搭得非常和諧平衡，如果配黃金的話就會顯得太黃，略嫌俗氣，色澤偏紅的玫瑰金剛好適合～錶面方面，指針、刻度、字體亦具有玫瑰金元素，非常一致，令呢隻GMT望落更加典雅精緻，相信無論男女都會十分喜歡！
另外，今年新款GMT Master II更搭載新3285機芯，動儲新增至70小時，而且機芯以鎳磷製成Chronergy擒縱系統，無論防磁、抗震、精確度亦有所提升。
價錢嚟講，公價當然係玫瑰間金的126711CHNR比較昂貴，不過論市價，其實與百事圈126710BLRO相差無幾，仲要唔洗逼住揀珠帶！大家又點睇？
