單係IWC Pilot’s Watch款式已經非常多，揀七日鏈好、Mark XVIII，定係年曆款呢？如果你初入錶壇，希望揀個大方、實用又靚仔的入門款，咁Ref.3777計時款一定係最好的選擇！
呢款Ref.3777係非常基本的計時款，小秒針盤設在9時方向，6時及12時方向分別係12小時計時及30分鐘計時，至於大秒針就係秒針時。另外，三點方向有日曆及星期顯示，十分方便。
配備的Santoni錶帶，係由意大利著名的皮具廠Santoni生產，全人手製作，出哂名上色細膩，單係上色已經有七個工序，之後再要剪裁、縫線、修飾皮帶等，相當繁複，三萬頭價錢的手錶都有一條靚錶帶，非常唔錯，亦相當易襯衫！
另一個重點，就係呢款Chronograph有好多顏色選擇，除咗封面的小王子特別版藍面啡帶，亦有黑面黑帶、啡面啡帶及鋼帶款等選擇，錶迷就唔洗怕搵唔到心頭好啦！
當然，有優點就有缺點，點解呢隻錶咁抵玩，就係因為佢並唔係用IWC全自製機芯，所以亦唔具備背透，可能有唔少人會覺得失望。雖然係咁，但係自製機芯款起碼貴兩倍，就算有折都要七萬起跳，如果你有呢個budget，當然亦有大把款式可以選擇，計時款Ref.3903及斯文款Ref.5010都係非常好選擇！不過，四萬樓下的話，又想要一定功能，Ref.3777一定當仁不讓奪冠～
